کامیل مەحمود
بێگومان لەناو دنیای بچوکی ئەمڕۆدا کە عەولەمە وەک گوندێکی لێکردووە هەر جەنگ و تەنگەژەیەک لەهەر جێگایەک ڕوو بدات بەشێوەیەک لەشێوەکان کاریگەری لەسەر شوێنەکانیتر دەبێت، تایبەت بەدۆزی فەلەستین کێشەکە کۆمەڵێک ڕەهەندی هەیە کە هەر گەل و گروپێکی مرۆیی بەهۆی ڕەهەندێک یان زیاترەوە بەو دۆزەوە پەیوەندیدارە، ڕەهەندەکانی کێشەی فەلەستین بریتین لەڕەهەندی سیاسی، نەتەوەیی، ئینسانی، ئایینی، نێودەوڵەتی و هەرێمایەتی و هتد، وەک گەلی کورد بەلای کەمەوە لەدوو ڕەهەنددا بەو کێشەیەوە پەیوەستین، لەڕەهەندە ئینسانییەکەدا کەئێمەش مرۆڤین و خراپی و دژواری دۆزی ئینسانی فەلەستینییەکان نیگەرانمان دەکات، لەڕووی ئایینییەوە ئێمە موسڵمانین و جولەکە دەستدرێژی دەکاتە سەر یەکێک لەپیرۆزترین شوێنە دینییەکانمان کە مزگەوتی ئەقصایە، هەروەها دەستدرێژی و ستەم لەموسڵمانان، لەڕووی سیاسیشەوە ڕۆژگارێک بووە کورد و فەلەستینییەکان لەسەرئاستی سەرکردەکانیان هاوخەمی یەکتر و ئاوارەی وڵاتان بوون، جگە لەوەش ئیسرائیل هەمیشە دەستی لەگەڵ ڕژێمە پیلانگێڕەکاندا تێکەڵ بووە بۆ زەبروەشاندن لەدۆزی کورد، لەنسکۆی شۆڕشی ئەیلولەوە تا دەستگیرکردنی عەبدوڵا ئۆجەلان بەپلانی موسادی ئیسرائیلی لەڕۆماو نایرۆبی...
کەواتە کوردیش گەل و قەوارەیەکەو بەحوکمی ئەو ڕەهەندانەی کێشەکە دەبێت هاوسۆزی و هەڵوێستی هەبێت، ئەوانەی ئەڵێن پەیوەندی بەکوردەوە نیە کەواتە کورد بەگەل و بەخاوەن قەوارە نازانن، ئێستا عەرەبەکان لەمیسرو ئەردەن و کەنداو کە پەیوەندی و ڕێککەوتنیان لەگەڵ ئیسرائیل هەیە نەیاتوانیوە ئەو ڕەهەندانە نادیدە بگرن و بۆ ئەوان ڕەهەندە نەتەوەیی و ئایینی و ئینسانییەکە ناچاری کردوون هەڵوێستی ناڕەزایی دژی تاوانەکانی ئیسرائیل دەربڕن.
ليست هناك تعليقات:
إرسال تعليق