كامیل مه‌حمود
له‌ئێستادا نێچیره‌ڤان بارزانی سه‌رۆكی هه‌رێمی
كوردستان به‌سه‌ردانێك له وڵاتی سویسرایه، وه‌ك هه‌موو كاره په‌نهان و ناشه‌فافه‌كانیتری
ده‌سه‌ڵاتدارانی ئه‌م هه‌رێمه سه‌ردانه‌كه‌ی سه‌رۆك بارزانیش دیار نییه كه ڕه‌سمییه
یان ناڕه‌سمی و له‌و باره‌یه‌وه هیچ سه‌رچاوه‌یه‌كی ڕه‌سمی له‌كوردستان لێدوانێكی
ڕانه‌گه‌یاندووه، له‌كاتێكدا سه‌ردانی كه‌سی یه‌كه‌م و سونبولی دبلۆماسیه‌تی هه‌ر
وڵات و هه‌رێم و ناوچه‌یه‌كی خۆبه‌ڕێوه‌به‌ری وه‌ك ئه‌مه‌ی ئێمه‌ش بۆ وڵاتێكیتر به‌بێ
ده‌نگی و له‌په‌نهان و تاریكیدا ئه‌نجام نادرێ و به‌پێی هه‌لومه‌رج و ئامانجی سه‌ردانه‌كه
ماوه‌یه‌ك پێش سه‌ردانه‌كه لایه‌نی په‌یوه‌ندیداری فه‌رمی وڵات شتێك له‌و باره‌یه‌وه
به‌خه‌ڵك و میدیا ده‌ڵێت، بۆ نموونه له‌كاته ئاساییه‌كان و به‌مه‌به‌ستی توندوتۆڵكردنی
په‌یوه‌ندییه دوو قۆڵییه‌كان یان له‌وه‌ڵامی بانگهێشتی هاوتا ڕه‌سمییه‌كه‌ی وڵاته‌كه‌یتردا
سه‌رۆكی وڵات بڕیاری سه‌ردانی ئاسایی ده‌ره‌وه ده‌دات و مانگێك یان زیاترپێش سه‌ردانه‌كه
میدیاكان و حكومه‌ت باس له‌و سه‌ردانه ده‌كه‌ن، له‌كاتی پێویست و ته‌نگه‌ژه‌كانیشدا
بۆ ئامانجێكی سیاسی یان ئابووری هه‌ندێ جار سه‌رۆك و كه‌سی یه‌كه‌می وڵات پێویست
ده‌كات له‌ناكاو سه‌ردانی وڵاتێك بكات، بۆ ئه‌مه‌ش لایه‌نی په‌یوه‌ندیداری حكومه‌ت
یان تایبه‌ت به‌كاروباری ده‌ره‌وه سه‌ردانه‌كه ڕاده‌گه‌یه‌نێنێت، ته‌نانه‌ت ئه‌گه‌ر
سه‌ردانه‌كه‌ش ناڕه‌سمی و بۆ به‌سه‌ربردنی پشووه‌كانیش بێت هه‌ر سه‌ردانه‌كان شه‌فاف
و ڕاگه‌یه‌نراو ده‌بن..
ئه‌وه‌ی جێگای سه‌رسوڕمان و نیگه‌رانییه لای
هاوڵاتی و مایه‌ی پرسیارو گومانه لای میدیا و چاودێرانی سیاسی ئه‌م سه‌ردانه‌ی سه‌رۆكی
هه‌رێمه بۆ سویسرا له‌م هه‌لومه‌رجه هه‌ستیارو پڕ له‌قه‌یرانه‌دا كه سه‌رۆك گه‌یشتووه‌ته
كیشوه‌ری ئه‌وروپا و بارودۆخی وڵاته‌كه‌شی له‌م كاته‌دا ته‌نها سه‌ردانی پێویست و
ئامانجداری گرنگ و ئومێدبه‌خشی ڕاگه‌یه‌نراو ده‌خوازێت بۆ چاره‌سه‌ری كێشه‌یه‌ك
یان ئه‌و هه‌موو كێشه‌و گرفتانه‌ی دووچاری هه‌رێمی كوردستان بووه، بێگومان كاته‌كه‌ی
ئێستاش سه‌ردانی ئاسایی و كاتبه‌سه‌ربردن ناخوازێت.
ئه‌مڕۆ هه‌رێمی كوردستان نغرۆی ده‌یان قه‌یرانی
سیاسی و ئابووری و ته‌ندروستی بووه و خه‌ڵك دووچاری نه‌داری و هه‌ژاری و بێ مووچه‌یی
و نه‌خۆشی بووه‌ته‌وه و خاكی وڵات ده‌ستدرێژی وڵاتانی ده‌وروبه‌ری له‌سه‌ره و قه‌واره‌ی
هه‌رێم له‌ژێر فشاری به‌غدا و قۆستنه‌وه‌ی بارودۆخه‌كه‌دا له‌به‌رده‌م مه‌ترسی لاوازكردن
و ته‌نانه‌ت هه‌ڵوه‌شانه‌وه‌شدایه، ئه‌م سه‌ردانه‌ی بارزانی به‌م میكانیزمه ناشه‌فاف
و له‌ناكاوه هیچ پاساوێك هه‌ڵناگرێت و جۆرێكه له‌بازدان به‌سه‌ر قه‌یرانه‌كان و
بێباكی له‌باری مه‌ینه‌تباری خه‌ڵكی كوردستان و دۆخی هه‌ستیاری وڵات، بێگومان ئه‌و
قسه‌وباسانه‌ی كه ده‌رباره‌ی سه‌فه‌ره‌كه‌ی سه‌رۆكی هه‌رێمیش ده‌كرێت سه‌رچاوه‌ی
له‌به‌دگوومانییه‌وه گرتووه‌و هه‌رده‌ره‌نجامی ناڕوونی و ناشه‌فافی سه‌ردانه‌كه‌یه،
ده‌بێت بارزانی یان دیوانی سه‌رۆكایه‌تی هه‌رێم ده‌رباره‌ی سه‌فه‌ره‌كه‌ی سه‌رۆكی
هه‌رێم و هۆكارو ئامانجه‌كانی ڕوونكردنه‌وه بدات و ڕاستی و ناڕاستی ئه‌و ده‌نگۆیانه‌ش
ئاشكرا بكات كه له‌سه‌ری بڵاوبوونه‌ته‌وه، ئه‌گه‌ر گه‌شته‌كه‌ی سه‌رۆك بارزانی
شه‌فاف و به‌پێی پرۆتۆكۆلی باو به‌ڕێوه ببرایه پارێزراو ده‌بوو له قال و قیل و
ده‌نگۆی ئابڕووبه‌رانه.
به‌داخه‌وه تائێستاش نوخبه‌ی ده‌سه‌ڵاتداری
كوردستان شه‌فافیه‌ت له‌هیچ كارێكیاندا نییه‌و نایانه‌وه‌ێ كه‌مترین زانیاری له‌سه‌ر
چۆنیه‌تی به‌ڕێوه‌بردنی وڵات لای هاوڵاتیانی خۆیان ئاشكرا ببێت، سه‌رباری ئه‌و هه‌موو
قه‌یران و مه‌ترسیانه‌ی ڕووی له‌هه‌رێمه‌كه‌مان كردووه ئه‌م مۆدێله له‌حوكمڕانی كه
29ساڵه به‌رده‌وامه جێگای بێزاری و پرسیاری خه‌ڵكه، ئاخۆ تاكه‌ی ئه‌م به‌ڕێزانه
وڵات له‌تاریكیدا به‌ڕێوه ده‌به‌ن؟!
ليست هناك تعليقات:
إرسال تعليق